Muǵalimdi  múgedek  etken  oqýshy 5 jylǵa sottaldy

Kókshetaý qalasy turǵyndary arasynda aıryqsha qoǵamdyq pikir qalyptastyrǵan bul oqıǵanyń núktesi Aqmola oblysynyń kámeletke tolmaǵandar isi jónindegi aýdanaralyq sotynyń qorytyndy májilisinde qoıyldy. Qaladaǵy joǵary tehnıkalyq mektebiniń oqýshysy V. QR Qylmystyq kodeksiniń 103-babynyń 2-bólimi «j» tarmaǵymen, buzaqylyq áreketi barysynda óz ustazyna aýyr jaraqat salǵany úshin aıypty dep tanyldy. Sóıtip, ol sot úkimimen bes jylǵa bas bostandyǵynan aıyryldy. Endi oqýshy aıybyn jalpy rejimdegi tárbıe kolonııasynda óteıtin bolady. Kókshetaý qalasy prokýro­ry­nyń jábirlenýshiniń memle­ket tarapynan emdelý shyǵyndaryna qatysty talaby óteldi. Al, muǵa­lim­ge moraldyq nuqsan kelti­ril­genine baılanysty 1 mıllıon teńge ótem ishinara qana­ǵattandyryldy. Buǵan qosa, oblystyq bilim basqarmasynyń atyna qylmystyq zań buzýshylyqtyń sebep-saldaryn anyqtap, tıisti shara qoldaný jóninde jeke qaýly shyǵaryldy. Sot oqýshynyń muǵalimdi qatty soqqyǵa jyqqandyǵy, osynyń saldarynan edenge basymen qu­lap, esinen tanǵanyn anyqtady. Sondaı-aq, jábirlenýshiniń aýyz qýysynyń súıegi jáne eki tisi synyp, mıy shaıqalǵan. Qazirgi kúni ol tósek tartyp jatyr, sol jaq denesi ǵana qozǵalatyndyqtan ózgeniń kómegine májbúr. Kıkiljiń muǵalimniń sabaq barysynda V-ǵa jasaǵan eskert­pesinen týyndaǵan eken. Baqbergen AMALBEK,  «Egemen Qazaqstan». Aqmola oblysy.